وجه المنتج أحمد الجنايني رسالة مؤثرة إلى الفنان والمنتج هشام جمال، عبر فيها عن امتنانه لدعمه الكبير في كواليس مسلسل "كتالوج" بالتزامن مع عرضه على منصة نتفلكس العالمية. 

كتب الجنايني عبر حسابه على موقع التواصل الاجتماعي "فيسبوك"، صورة تجمعه بـ هشام جمال، كتب: "عندي كلمتين حابب أقولهم لصاحبي وأخويا هشام جمال بعد ما الحمد لله المسلسل نزل، ويا رب يعجبكم، شكرا يا هيشو على إنك وقفت جنبي في أصعب الأوقات، وشكرا إنك اعتبرت المسلسل ده مسلسلك واشتغلت عليه كأنه واحد من أعمالك اللي أنا بحبها واتعلمت منها".

استكمل الجنايني حديثه:" مش عارف أبدأ منين الصراحة، من إنك أقنعت كابتن محمود الخطيب إنه ينورنا في المسلسل، ودي كانت حاجة شبه الحلم، ولا إنك عملت الأغنيتين، ولا إنك أقنعت موزع الموسيقى مادي، وأشرفت بنفسك على المزيكا. كفاية إحساسي إن عندي أخ بجد وقف جنبي وسندني في وقت صعب، لأنه نفسه يشوفني ناجح".

أنهى الجنايني رسالته :" لو في نجاح اتحقق، فأنت سبب كبير فيه، وده على المستوى العملي، أما على المستوى الشخصي، فأنت عملت كتير، بس عشان منعيطش كلنا، مش هقول أنت عملت إيه، بس أنت عارف. بحبك يا صاحبي وأخويا، وأحلى عريس في الدنيا، وإن شاء الله أقدر أرد ولو جزء بسيط من اللي عملته علشاني".

مسلسل كتالوج من بطولة محمد فراج ، وظهور خاص للنجمة ريهام عبد الغفور، سماح أنور، تارا عماد، صدقى صخر ، خالد كمال، بيومى فؤاد، دنيا سامى، الطفل على البيلى، أحمد عصام السيد، الطفلة ريتال عبد العزيز، إنتاج أحمد الجنايني وتأليف أيمن وتار وإخراج خالد الحلفاوي.