كتبت : أميرة خالد

تصدرت الفنانة مروة عبدالمنعم محرك بحث جوجل، ومواقع التواصل الاجتماعي خلال الـ 48 ساعة الماضية، بعد تصريحاتها المثيرة للجدل عن قرار ابنتها خلع الحجاب، بالإضافة إلى هجوم إحدى الفتيات عليها عبر مداخلة هاتفية في برنامجها «تفاحة مصرية»، بسبب عملها كمذيعة بعدما كانت ممثلة، في حين أن أغلب خريجي كليات الإعلام لم يجدوا فرصة عمل في المجال.

وجاءت تصريحات مروة عبدالمنعم كالتالي:

قالت مروة عبدالمنعم في بودكاست «أمل غرايبة»: «أنا بتكلم مع ربنا وبقرأ رسايله وبفهم هو بيقولي إيه، اللي بيني وبين ربنا مش بالحجاب، وأنا هدخل الجنة برحمة ربنا وبالصلاة، وفي القبر هتسئل عن الصلاة».

وأضافت: «بنتي عندها 14 سنة ولما خلعت الحجاب الناس اتهمتني بالكفر وإني هدخل النار، قولت لبنتي إنتي هتخلعي الحجاب بس بتعاندي عشان ما تطلعيش رجعتي في كلامك».

 

 

 

 

متصلة تهاجم مروة عبدالمنعم

تعرضت الإعلامية مروة عبدالمنعم، في اليوم الثاني من تصريحاتها عن الحجاب، للهجوم الشديد من قبل متصلة عبر الهاتف تدعى «عبير»، خلال حلقة برنامجها «تفاحة مصرية»، بعدما وجهت لها العديد من الانتقادات بسبب مظهرها على الهواء بملابس لا يليق بالإعلام المصري.

وأعربت المتصلة عن استيائها؛ قائلة: «أنا عندي مشكلة مع الناس اللي بتشتغل مهنة تانية غير مهنتها»، وتساءلت عن مدى صحة عمل مروة كمذيعة رغم كونها ممثلة، حضرتك كدا مثلا شغالة مذيعة وإنتي ممثلة.. معرفش تيجي إزاي.. وأنا عندي 27 وخريجة إعلام وقاعدة مبشتغلش عشان حضرتك واخدة مكاني».

متصلة تهاجم مروة عبدالمنعم: طالعة بجينز وبنطلون وكوتش

وأضافت المتصلة: «عملتي حلقة عن أين اختفت الأنوثة والنهاردة طالعة بجينز وبنطلون وكوتش، المفروض نسأل حضرتك أين اختفت المذيعة، زمان كانت بتلبس بدل وشعرها مهندم، إنتى إزاي طالعة على الشاشة كده؟ هو ده يليق بالإعلام؟».

مروة عبدالمنعم تدافع عن نفسها: «أنا اشتغلت على نفسي 25 سنة».

لترد عليها مرة عبدالمنعم: «مشكلتك حاليًا إنك اتخرجتي من إعلام ومش لاقية شغل فبتهاجمي أي حد، المفروض بدل الهجوم تدوري على حلول، مش تهاجمي نجاح الآخر».

واستكملت مروة دفاعها عن نفسها؛ قائلة: «أنا خريجة معهد فنون مسرحية، ينفع أعمل كل حاجة، أمثل، وأقدم برامج، واشتغل دوبلاج، وفي الإذاعة، لأني خريجة المعهد والقلائل جدًا إللي بيعرفوا يدخلوا هذا المعهد».

وأضافت: «أنا قعدت على كرسي المذيعة بعد 25 سنه شغل، وإنتي عمرك 27 سنه وبتهاجمي الناس عشان لسه موصلتيش لفرصه، وقبل ما اشتغل مذيعة أو ممثلة، كنت مندوبة مبيعات بلف على البيوت، واشتغلت سمسارة، وسكرتارية، واشتغلت في الإعلانات، لكن كنت حاطة هدف اني هبقي ممثلة».

وأشارت مروة عبدالمنعم إلى لجوئها إلى التدريس مع التمثيل، قائلة: «كنت ممثلة وبدي دورس وأخدت كورسات تمثيل عشان أعرف أدي فيه دروس لمده 9 سنين، أنا اشتغلت على نفسي، وبقيت مذيعة بسبب تعبي، من غير ما أحقد على حد، لو كنتي اعلامية شاطرة كنتي تابعتي الحلقات قبل الحكم عليا، وانا متأكدة دايمًا أن الشاطر هو اللي هينجح ويوصل».