خرج النجم تامر حسني عن صمته بعد هجوم طليقته بسمة بوسيل، على هالة عمر، منسقة أعمال تامر، التى احتفلت بزواجها منذ 48 ساعة فقط، ومن ثم خرجت بسمة وأثارت الجدل مؤكدة أنها تسببت فى طلاقها من تامر، ما أثار جدلًا واسعًا بين رواد السوشيال ميديا.
وتساءل الكثير من الجمهور عن هالة عمر، ومن ثم خرج تامر بفيديو من حفل زفاف هالة، عبر حسابه الرسمي على موقع التواصل الاجتماعي “فيسبوك” وعلق عليه بمنشور مطول قائلًا: لكل اللي بيسأل عن إيه وجه القرابة بيني وبين العروسة الجميلة دي، شايف أسئلة كتير أنا هحكيلكوا – هي اسمها هالة عمر، عرفتها كانت بنت من الفانز صغيرة ومن المقاتلين والمدافعين عن تامر على الإنترنت, ومن كتر دفاعها عنى لفتت نظري ومرة رديت عليها شكرتها ولما سافرت إسكندرية في الوقت ده لقيت بنت صغيرة أوي بتعيط وبتجري عليا فا وقفتلها وفكرتني بنفسها وفضلت تعيط وتقولي إحنا معاك ولازم تكمل عشان كنت بتحارب جدًا في بداياتي فا اتصدمت إن اللي بتقول كده بنت صغيرة كده وةالمجهود ده كله اللي عاملاه بنت صغيرة عندها ١٤ سنة، وقتها كانت السوشيال ميديا لسه بتطلع وكنا في شركتنا بندور على شركة كبيرة تمسكلي السوشيال ميديا لحد ما قولتلهم أنا مش عايز شركة كبيرة أنا عايز البنت الصغيرة دي هي اللي تمسكها فضلوا يقنعوني إن كده مش صح ولازم أكتر حد خبرة يمسكها وأنا قولت لا لازم أكتر حد بيحبني هو اللي يمسكها وأنا واثق إن طاقة الحب مفعولها أقوى من طاقة المحترف بلا حب، فعرضت عليها تشتغل معايا وهي في السن ده مصدقتش طبعًا ومن ساعتها وهي اللي ماسكة كل شغل الميديا، الطفلة الشاطرة اللي كبرت دلوقتي قدامكم هالة عمر.
وأضاف: أما بقى عريسها العسل ده اسمه «عمرو» طلب إيديها مني أنا عشان والدها ووالدتها توفاهم الله، في سنة واحدة رحمهم الله، ياريت نفتكرهم ونهديلهم ثواب الدعاء والفاتحة.. ومن اللحظة دي اتحولت هالة لبنتي الكبيرة بجد اللي بتتجوز دلوقتي قدامي وبسلمها لعريسها بنفسي وبغني في فرحها، معرفتش أرد على كلامك عني في الفرح يا هالة رديت دلوقتي هنا، ربنا يكرمك ويسعدك مع جوزك الجميل المحترم اللي هيكون ضهرك وسندك ويكمل معاكي مشوار حياتك مع أولادكم الجُمال بإذن الله”.
يذكر أن بسمة بوسيل قامت بحذف كل صورها مع تامر حسني، قبل قليل، عبر حسابها الشخصي على موقع التواصل الاجتماعي “إنستجرام”، على الرغم من أنها كانت محتفظة بالصور وعلى تواصل دائم معه رغم الطلاق.
كما قامت “بسمة” بالهجوم الحاد على هالة عمر، من خلال ستوري، عبر حسابها بموقع تبادل الصور والفيديوهات “إنستجرام”، حيث نشرت مقطع فيديو خلال حضور تامر حسني لحفل زفاف هالة، معلقة: “حسبي الله ونعم الوكيل فيكي يا هالة”.
أحدث التعليقات