كتبت : مريم يعقوب

نشر الاعلامي محمود سعد فيديو عبر حسابه الرسمي باليوتيوب يكشف فيه اسرارا جديدة تخص حياة الزعيم عادل إمام.

بدأ الاعلامي حديثه قائلا: عادل إمام كان مشغول جدًا فترك مسؤولية البيت لزوجته هالة الشلقاني، وأنا حضرت معاه بيوته من أول بيت لحد الآن، شفت بيته في شارع النخيل ونادي الصيد والمنصورية، وعرفت قد إيه أنا أمام أسرة مش بس بيحبوا بعض، ولكن معاشرين بعض، وشفت قد إيه هو بيهتم بأخواته.. كانوا عيلة متكاملة ماشية مع بعضها، وفي مرة فرجني على غرفة رامي وبعدين غرفة سارة وبعدين غرفة محمد، ورأيت مدى الارتباط بينه وبينهم، والعيلة دي استمرت بقوة هالة الشلقاني وإخلاص عادل إمام.. أسرة في منتهى الحب.. وده ظاهر في الفيديو الأخير بين رامي ومحمد فيه حب حقيقي.

استطرد سعد حديثه: كان مدي زوجته السلطة كاملة وكانت كلمتها مسموعة، كان أب ناجح وبيكافح علشان يكون فى مكانه وبيدي زوجته مكانتها وكانت كلمتها مسموعة وبتعمل كل حاجة، والولاد مرتبطين بوالدهم، وهي عيلة تشرح القلب وفي الآخر حد يقول سيبوه يخرج،في ناس كتير حياتهم اتمزقت بسبب الفن والتخبط والانشغال ورأيت هذه العذابات في حياة أحمد زكي لما مرة قابلته في الأوتيل اللي قاعد فيه وكنت عاوز أعرف هل في حياته لحظة ندم وفضل يقول أي كلام ومش عاوز يقول الحقيقة، كان عاوز يمثل طول الوقت وما اعرفش يعمل حياة أسرية، ولكن عادل كان حاطط في باله يكون أسرة متماسكة حقيقية زي أسرته اللي في الحلمية أسرة متماسكة وحقيقية.. العلاقة بينهم حقيقية.

واصل محمود سعد: ما كانش بيشغل مصطفى متولي علشان جوز أخته ده كان صاحبه جدًا، محدش شافه يوم وفاة مصطفى متولي كنت واقف جمبه شفته في حالة ذهول، لأنهم كانوا في المسرح خلصوا الساعة 2 ونص ولما روحوا أخت مصطفى كلمته قالت ليه الحق مصطفى مات.. كان في حالة ذهول كأنه مش موجود من الصدمة وحزنه على مصطفى متولي أنا شفته ومشينا وروحنا الدفنة.

 

وأردف سعد ايضا: عادل عنده ارتباط أسري خلاه طول الوقت يفرق بين أنه نجم كبير جدا وأنه أب وأخ وزوج ولذلك الله أكبر اتجوز هالة الشلقاني وخلاص على كده من سنين طويلة، على الرغم من أننا بنسمع علاقات الفنانين ولكن ما سمعناش عن عادل إمام حاجة.. كان حاطط في اعتباره أن زي ما بنى مستقبله والهرم اللي بناه كفنان يبني أسرة، عادل نجم كبير وعنده فلوس قول زي ما أنت عايز.. ولكن عادل هو إنسان مصري من الحلمية حريص إنه يكون عنده أسرة متماسكة وأتمنى تكون أسر كتير زيها، لأن الإنسان لما بينجح في حياته بيحصل لها تخبطات، وعادل ما اتولدش نجم بالعكس تعب كتير وشقي، والناس لما بيحصل لها نجومية وشهرة وفلوس بيتلغبطوا لكنه ما اتلغبطش خالص زرع الحب في سارة ومحمد وعصام وهالة الشلقاني.